Azərbaycanda 3 fəsil yoxa çıxacaq

Aprel ayının hava proqnozu ilə bağlı yayılan məlumat müzakirələrə səbəb olub. Məlumata görə, Bakıda və Abşeron yarımadasında bəzi günlərdə 25-30 dərəcə isti olacağı, bölgələrdə bu rəqəmin 32 dərəcəyə qədər yüksələcəyi qeyd edilir. Bundan əvvəlki illərdə aprel ayları adətən yağışlı, sərin keçirdi. 

Builki dəyişiklik iqlimlə bağlı ciddi fəsadlardan xəbər verə bilərmi?

Globalinfo.az-a danışan ekoloq alim Telman Zeynalov havaların isti keçməsinin iqlimə mənfi təsir etməyəcəyini bildirib:

"Baxın, fevralın sonuna qədər hava isti keçdi, həmin ayın sonundan martın ortalarına kimi isə soyuq oldu, qar və yağış yağdı. Bu da ondan xəbər verir ki, biz artıq zamanla yaz fəslini itirir, qışdan birbaşa yaya keçirik".

T.Zeynalov 4 fəsildən ikisinin yavaş-yavaş sıradan çıxma səbəbini açıqlayıb:

"Bilirsiniz, karbon qazı nə qədər çox artarsa, o qədər də qış aradan çıxmış olar. Yəni karbon qazın artması qışın və yazın, eləcə də payızın aradan çıxmasına səbəb olur. Ortada bir tək yay fəsli qalır. Havaların isti olmasının da heç bir təhlükəsi yoxdur. Əksinə, məhsullar bol olacaq, yağışsız və susuz qalmayacağıq. Bizim 8400 çayımız var. Ona görə də narahatlığa səbəb yoxdur".