Fuci dağına qalxmaq artıq pulsuz deyil: Yeni qaydalar tətbiq edildi

Yaponiyanın əsas simvollarından biri olan əfsanəvi Fuci dağına qalxmaq artıq pullu olacaq.

presstvaz-ın verdiyi məlumata görə, bu barədə “Kiodo” xəbər yayıb.

Bildirilir ki, bu yaydan etibarən, məşhur vulkanın yerləşdiyi Şidzuoka və Yamanaşi prefekturaları bütün dörd cığır üzrə qalxmağa ödəniş tətbiq edirlər.

Dörd marşrutdan üçünü – Fucinomiya, Qotemba və Sibasirini idarə edən Sidzuoka prefekturası qalxış üçün 4 000 yen (təxminən 46 manat) məbləğində tarif müəyyən edib. Keçən il Yamanaşi prefekturası ən populyar Yosida cığırı üçün oxşar tədbir tətbiq etmişdi. Beləliklə, Fuci zirvəsinə pulsuz qalxmaq artıq mümkün olmayacaq.

Bundan əlavə, hakimiyyət gecə qalxışları həvəskarları üçün də qaydaları sərtləşdirib. Artıq cığırlara saat 14:00-dan sonra giriş yalnız dağ hotellərindən birində əvvəlcədən yaşayış rezerv etmiş şəxslərə icazə verilir. Bu tədbir qaranlıq vaxtlarda zirvəni fəth edən alpinistlərin sayını məhdudlaşdırmağa yönəlib.

Qalxış haqqının tətbiqi turistlər arasında Fucinin artan populyarlığı və bununla bağlı problemlərlə izah olunur. Hakimiyyət cığırların həddindən artıq dolması və kütləvi turist axınının dağın zərif ekosisteminə mənfi təsiri ilə bağlı narahatdır. Toplanan vəsaitin qalxışların təhlükəsizliyini təmin edən personal xərclərini ödəmək və təbiəti qoruma tədbirlərini həyata keçirmək üçün istifadə edilməsi planlaşdırılır.

Dəniz səviyyəsindən 3776 metr yüksəklikdə yerləşən Fuci dağı təkcə Yaponiyanın ən yüksək nöqtəsi deyil, həm də UNESCO-nun Dünya İrsi obyektidir. 2024-cü ildə, yay qalxış mövsümü ərzində, Fuci zirvəsinə təxminən 204 min insan qalxıb. İlin qalan mövsümlərində dağa çıxmaq qadağandır.