İsrail kəşfiyyatının qərargahı VURULDU

İran ordusu İsrailin Hayfadakı hərbi dəniz bazasında yerləşən “Aman” hərbi kəşfiyyat qərargahına, radioelektron kəşfiyyat bölməsinə, “Green Pine” radar stansiyasına və sualtı qüvvələr qərargahına zərbələr endirib.

presstvaz xəbər verir ki, bu barədə İran dövlət televiziyası ordunun mətbuat xidmətinə istinadən məlumat yayıb.

“Bu gün səhərdən etibarən İsrail ərazisindəki bir neçə hədəfə, o cümlədən hərbi kəşfiyyat təşkilatı “Aman”ın 8200-cü bölməsinin (“Aman” daxilində elektron kəşfiyyat bölməsi), “Green Pine” radar stansiyası və Hayfa dəniz bazasındakı sualtı qayıq qərargahının binasına PUA-larla zərbələr endirilib”, – deyə xəbərdə bildirilib.

09:32

İrandan İsrailə yeni raket buraxılışı qeydə alınıb.

presstvaz xəbər verir ki, bu barədə İsrail Müdafiə Qüvvələri (SAXAL) məlumat yayıb.

“SAXAL İrandan İsrail istiqamətində raket atışını aşkar edib. Müdafiə sistemləri təhlükənin qarşısının alınması üzərində işləyir. Müvafiq rayonlarda ehtiyat tədbirləri barədə göstərişlər mobil telefonlara göndərilib”, – deyə SAXAL-dan bildirilib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.