BDYPİ-dən piyadalara müraciət: “Həyatınızı təhlükəyə atmayın”

İdarənin Mətbuat Xidməti ictimai nəqliyyat gözləyən vətəndaşlara xəbərdarlıq etdi

       Baş Dövlət Yol Polisi İdarəsinin (BDYPİ) Mətbuat Xidmətindən presstvaz-a daxil olan məlumata görə, yol hərəkətinin ən müdafiəsiz iştirakçıları olan piyadalara təhlükəsizlik qaydaları ilə bağlı mühüm xatırlatma edilib.

Məlumatda bildirilir ki, piyadalar ictimai nəqliyyatı yalnız təyin olunmuş minik meydançalarında, avtobus dayanacaqlarında, onlar olmadıqda isə səkidə və ya yol çiyinlərində gözləməlidirlər. Yolun hərəkət hissəsinə çıxmaq və nəqliyyat vasitələrinin hərəkət zolaqlarında dayanmaq həm piyadanın həyatı üçün ciddi risk yaradır, həm də sürücülər üçün gözlənilməz maneəyə çevrilir.

       presstvaz  xəbər verir ki, BDYPİ piyadaları bir anlıq diqqətsizliyin ağır və arzuolunmaz nəticələrə səbəb ola biləcəyi barədə xəbərdar edib. Qeyd olunub ki, hər bir piyadanın qaydalara riayət etməsi ümumi yol hərəkəti təhlükəsizliyinin vacib şərtidir. Baş Dövlət Yol Polisi İdarəsi bir daha vətəndaşları şəxsi təhlükəsizliklərini qorumağa və yol hərəkəti qaydalarına ciddi əməl etməyə çağırır.

presstvaz  – Azərbaycanın etibarlı informasiya mənbəyi