“Neçə illərdir qazımız yoxdur, soyuqdan əziyyət çəkirik” – Salyan sakinlərindən şikayət

Salyan rayonunun 700-ə yaxın sakini olan Ərəbqardaşbəyli kəndinin sakinləri illərdir mavi yanacağın olmamasından əziyyət çəkirlər.

Onlar Baku TV-nin qaynar xəttinə müraciət edərək sərt qış aylarında soyuqdan donmamaq üçün aidiyyəti qurumlardan kömək istəyirlər.

Kənd sakinlərindən biri deyib ki, illərdir mavi yanacağın olmaması onların həyatını xeyli çətinləşdirib: “Neçə illərdir qazımız yoxdur, soyuqdan əziyyət çəkirik. Uşaqlarımızın hamısı kəndi tərk edib, cavanlardan demək olar ki, heç kim qalmayıb”.

“Odun yoxdur, qırılıb batırıq. Uşaqlarım soyuq səbəbindən xəstələnib. İcra hakimiyyətinə və kənd nümayəndəliyinə müraciət etmişik, “olacaq” deyirlər, amma hələ də nəticə yoxdur”, – başqa bir sakin qeyd edib.

Məsələ ilə bağlı “Azəriqaz” İstehsalat Birliyindən bildirilib ki, ölkə üzrə qazlaşdırılmayan kəndlərin və yeni yaşayış massivlərinin qazlaşdırılması qurumun gündəliyində olan əsas məsələlərdəndir.

Qurumdan verilən məlumata görə, qazlaşdırma proqramı daxili maliyyə imkanlarına uyğun olaraq mərhələli şəkildə həyata keçirilir və sözügedən kəndə küçə qaz xətlərinin çəkilməsi məsələsinə növbəti mərhələlərdə baxıla bilər.