Elm və təhsildə qardaşlıq körpüsü: Türkiyə və Azərbaycan arasında yeni razılaşma

Türkiyə Ali Təhsil Şurasında (YÖK) qurumun sədri, professor doktor Erol Özvar və Azərbaycanın elm və təhsil naziri Emin Əmrullayevin iştirakı ilə imzalanma mərasimi keçirilib.

presstvaz “Haber Globala”a istinadən xəbər verir ki, mərasimdə çıxış edən Erol Özvarun sözlərinə görə, eyni tarixə, ortaq mədəniyyətə və gələcəyə dair vahid baxışa malik olan, xüsusi qardaşlıq münasibətləri ilə bağlı Türkiyə və Azərbaycan arasındakı möhkəm əlaqələr bu gün elm və təhsil sahəsində institusional və davamlı əməkdaşlıqlar vasitəsilə daha da gücləndirilir.

Əməkdaşlığı mühüm və strateji addım kimi dəyərləndirən Özvar qeyd edib ki, imzalanacaq anlaşma memorandumu çərçivəsində köklü tarixə və beynəlxalq nüfuza malik İstanbul Texniki Universitetinin bilik və təcrübəsi Qarabağ Universitetinin inkişafına əhəmiyyətli töhfə verəcək.

Professor Özvar vurğulayıb ki, tələbə və müəllim mübadiləsi, birgə elmi-tədqiqat layihələri, ikili diplom proqramları, eləcə də mühəndislik sahəsində ortaq laboratoriya fəaliyyətləri bu əməkdaşlığın əsas istiqamətlərini təşkil edir. Onun sözlərinə görə, ali təhsil sahəsində qurulan hər bir strateji tərəfdaşlıq Türkiyə və Azərbaycanın ortaq gələcəyinə qoyulan mühüm sərmayədir.

Erol Özvar həmçinin gələcək dövrlərdə bakalavr səviyyəsində əməkdaşlıqla yanaşı, magistratura, doktorantura və doktoranturadan sonrakı mərhələlərdə də elm və texnologiya sahəsində Türkiyə ilə Azərbaycan arasında əməkdaşlığın daha da genişləndirilməsinin hədəfləndiyini bildirib. O, Prezident Rəcəb Tayyib Ərdoğan və Prezident İlham Əliyevin tapşırıqları əsasında iki ölkə arasında elm və texnologiya sahəsində əməkdaşlığın daha yüksək səviyyəyə qaldırılması istiqamətində ardıcıl işlərin aparıldığını diqqətə çatdırıb.