Polis tərəfindən narkotik və qanunsuz silah-sursat aşkar edilərək dövriyyədən çıxarılıb

Yanvarın 19-da ölkə ərazisində qeydə alınan cinayətlərin açılması təmin olunub

        Daxili İşlər Nazirliyinin rəsmi mənbələrindən presstvaz-a daxil olan məlumata əsasən, yanvarın 19-da ölkə ərazisində qeydə alınan 37 cinayətin, eləcə də əvvəlki dövrlərdən bağlı qalan 1 cinayətin açılması polis əməkdaşları tərəfindən təmin edilib.

Görülən tədbirlər nəticəsində axtarışda olan ümumilikdə 110 nəfər, o cümlədən borclu şəxs qismində axtarışda olan 89 nəfər saxlanılaraq aidiyyəti üzrə təhvil verilib. Həmçinin cinayət törətməkdə şübhəli bilinən 28 nəfər saxlanılıb.

        Bildirilib ki, narkotiklərlə əlaqəli 12 fakt, qanunsuz saxlanılan silah-sursatın aşkarlanması və götürülməsi ilə bağlı isə 21 fakt müəyyən edilib. Polis əməkdaşlarının keçirdikləri əməliyyat tədbirləri nəticəsində ümumi çəkisi 7,3 kiloqramdan artıq narkotik vasitə aşkar edilərək dövriyyədən çıxarılıb.

Eyni zamanda, dələduzluq cinayətlərinə görə axtarışda olan 11 nəfər saxlanılaraq istintaqa təhvil verilib. Ailə üzvlərini məlumatlandırmadan yaşayış yerini tərk etdiyinə görə itkin düşmüş kimi axtarışı aparılan 4 nəfər isə tapılaraq aidiyyəti üzrə təhvil verilib.

        Qanunsuz saxlanılan odlu silah-sursatın aşkar edilməsi istiqamətində görülən tədbirlər nəticəsində yanvarın 19-da paytaxt və respublikanın ayrı-ayrı rayonlarında 4 avtomat silahı, 1 pulemyot, 1 qumbara, 15 tüfəng, 1 patron darağı və 507 ədəd müxtəlif çaplı patron aşkar edilərək götürülüb.

DİN tərəfindən qeyd olunan istiqamətlər üzrə qətiyyətli mübarizə tədbirləri davam etdirilir.

presstvaz  – Azərbaycanın etibarlı informasiya mənbəyi