Bir sıra küçə və prospektlərdə nəqliyyatın hərəkət istiqaməti dəyişdiriləcək

20 Yanvar – Ümumxalq Hüzn Günü ilə əlaqədar Bakıda bəzi yollar bağlanacaq

       Daxili İşlər Nazirliyinin rəsmi mənbələrindən presstvaz-a daxil olan məlumata əsasən, 20 Yanvar – Ümumxalq Hüzn Günü ilə əlaqədar paytaxtın bir sıra küçə və prospektlərində nəqliyyatın hərəkətinə müvəqqəti məhdudiyyətlər tətbiq ediləcək, bəzi istiqamətlər dəyişdiriləcək.

Bildirilib ki, yanvarın 20-də səhər saat 08:00-dan mərasim başa çatanadək Parlament prospekti ilə kəsişən və birləşən bütün küçələrdə avtomobillərin hərəkəti tam məhdudlaşdırılacaq. Bu tədbirlər 20 Yanvar faciəsi qurbanlarının xatirəsini yad etməyə gələn vətəndaşların rahat, fasiləsiz və təhlükəsiz hərəkətinin təmin olunması məqsədilə həyata keçirilir.

       Məhdudiyyətlər Mikayıl Müşfiq küçəsi ilə Hüseyn Cavid prospektinin kəsişməsindən, Mikayıl Müşfiq dairəsi – Mətbuat prospekti, Mehdi Hüseyn küçəsi (Teleteatr binasının qarşısı), İzzət Nəbiyev və Abbasqulu Abbaszadə küçələrinin kəsişməsi, yəni Milli Məclisin inzibati binasının arxa hissəsindən Parlament prospekti – Şəhidlər xiyabanı istiqamətində tətbiq olunacaq. Həmin ərazilərdə bütün nəqliyyat vasitələrinin hərəkəti məhdudlaşdırılaraq alternativ istiqamətlərə yönləndiriləcək.

Bu səbəbdən sürücülərə şəxsi avtomobillərdən mümkün qədər az istifadə etmələri, hərəkət zamanı yaranacaq sıxlıqları nəzərə alaraq ictimai nəqliyyata üstünlük vermələri tövsiyə olunur.

        Polis əməkdaşları tərəfindən ərazilərdə nəqliyyatın tənzimlənməsi və təhlükəsizliyin təmin olunması məqsədilə gücləndirilmiş rejimdə xidmət aparılacaq.

presstvaz   – Azərbaycanın etibarlı informasiya mənbəyi