Güzgü özünüdərkə aparan yol kimi: Bakıda Günel Ravilovanın sərgisi açılacaq

Yanvarın 17-də “Nine Senses” İncəsənət Mərkəzinin “JW Marriott” filialında Günel Ravilovanın “Güzgülər” adlı sərgisi açılacaq.

presstvaz xəbər verir ki, sərgidə güzgü sadəcə bir obyekt kimi deyil, həm də izləyici ilə dialoq üçün bir vasitə kimi təqdim edilir. Tədbir Günel Ravilovanın bir sıra sənət əsərlərini eyni məkana toplayır.

Sərgidə güzgüdəki təsvir özünüdərk və daxili münaqişə üçün metaforaya çevrilir. Əsərlərlə qarşılıqlı əlaqədə olan izləyici öz təcrübəsini, yaddaşını, ailəsini və şəxsi əlaqələrini anlama prosesinə cəlb olunur – xarici görüntü ilə daxili vəziyyət arasındakı sərhədlər itir.

Sərgidə Maksim Tatarintsevin “Sıfır” videoart əsəri də nümayiş olunacaq. Əsər son nöqtədən məhrum olan gerisayım prinsipinə əsaslanır. “Sıfır” videoart layihəsi informasiya təzyiqi, fərdiliyin itirilməsi və daimi xarici təsir qarşısında zamanın qavranılması məsələlərini əhatə edir.

Hər iki layihə müasir fərd haqqında – əksolunma və boşluq, obraz və gözlənti, daxili və xarici informasiya arasında ardıcıl bədii bir ifadə qurur.

Qeyd edək ki, Günel Ravilova beynəlxalq sərgi təcrübəsi olan azərbaycanlı rəssamdır. 1998-ci ildən bəri o, Azərbaycanda və xaricdə 70-dən çox sərgidə iştirak edib. Qadınlara qarşı zorakılıq mövzusuna həsr olunmuş sərgidə birincilik qazanıb.

2011-ci ildən bəri Günel Ravilova Azərbaycan Rəssamlar İttifaqının üzvüdür. O, həmçinin Beynəlxalq Rəssam-Fəallar Birliyinin üzvüdür.

Günel Ravilovanın əsərləri İtaliya, Fransa və Avstriyada sərgilənib. 2016-cı ildə onun əsərlərindən biri Parisdəki “Louvre Carrousel” sərgisində satılıb.

Maksim Tatarintsev video, instalyasiya və rəngkarlıqla məşğul olan rəssamdır. O, Stroqanov adına Moskva Dövlət İncəsənət və Dizayn Akademiyasını bitirib, Moskvadakı Müasir İncəsənət İnstitutunda təhsil alıb. Tatarintsev Moskva Rəssamlar İttifaqının və Rusiya Rəssamlar Yaradıcılıq İttifaqının üzvüdür, Rusiyada və xaricdə beynəlxalq sərgilərdə iştirak edib.