Futbol meydanından məşqçilik kürsüsünə: Qurban Qurbanov Qara Qarayevin yeni vəzifəsini alqışladı

“Qarabağ”ın baş məşqçisi Qurban Qurbanov keçmiş futbolçusu Qara Qarayevin Azərbaycanın U-21 millisinin məşqçi heyətinə qatılması barədə fikirlərini bölüşüb.

presstvaz Qol.az-a istinadən xəbər verir ki, təcrübəli mütəxəssis jurnalistlərə açıqlamasında 33 yaşlı yarımmüdafiəçinin məşqçilik karyerasının başlanğıcı ilə bağlı müsbət proqnozlar verib.

“Qara Qarayev U-21 millimizə ancaq faydalı ola bilər. Başqa cür düşünməyə heç ehtiyac da yoxdur. Çünki məşqçiliyə tez başlaması gələcəkdə onun özünə, karyerasına daha faydalı ola bilər”, – deyə Qurbanov vurğulayıb.

Futbolçu karyerası ərzində “Qarabağ”da Qurbanovun rəhbərliyi altında uğurla çıxış edən Qarayev, həmçinin Rusiya klubu “Rubin Kazan”da da forma geyinib. O, Azərbaycan milli komandasında 71 oyun keçirib və ölkə futbolunun ən tanınmış simalarından birinə çevrilib.

Qeyd edək ki, Qarayevin özü hələlik futbolçu karyerasını rəsmən başa vurduğunu açıqlamayıb. Azərbaycan yığmasının və “Qarabağ”ın sabiq futbolçusu U-21 millisində analitik vəzifəsinə təyin olunub.