Deputat: “İdxal olunan mallar qanunsuz saxlanılma hallarında xarab olur”

“Ölkəyə gələn malların saxlanması məsələsində də əlavə problemlərin qarşısı alınmalıdır. Çünki müştəri məmnuniyyəti də çox aşağı düşür”.

presstvaz xəbər verir ki, bunu Milli Məclisin İctimai birliklər və dini qurumlar komitəsinin sədri Fazil Mustafa parlamentin bugünkü plenar iclasında çıxışı zamanı deyib.

O bildirib ki, ölkəyə gələn mallar daha çox qanunsuz və əsassız saxlanılma hallarında xarab olur:

“Başqa qonşu ölkələrdə bu bir çox hallarda bir-iki saata həll olunan prosedur, bizdə bəzən bir gün, iki gün yubadılma ilə nəticələnir. Bunun nəticəsində isə malın xarab olmasına görə məsuliyyət ekspedisiya şirkətinin üzərinə düşür və ya tərəflər arasında böyük mübahisələr yaranır. Bu problemlər yaxın gələcəkdə daha da ciddi görünə bilər. Ona görə də bu məsuliyyət məsələsini qanunda dəqiq göstərməliyik”.

Komitə sədri vurğulayıb ki, bu təkcə iqtisadi məsələ deyil:

“Bütün bu məsələlərdə dəqiq mexanizmlər olmalıdır. Məsələn, yükün, malın, maşının qanunsuz olaraq 3-5 gün saxlanılması hallarından uzaq durulmalıdır. Məsuliyyət olmadıqda həmişə belə problemlər, əlavə xərc və mübahisələr yaranacaq”.