Çində keçmiş şirkət rəhbərinə rüşvətə görə ölüm cəzası verildi

Pekin məhkəməsi “New China Life Insurance” şirkətinin keçmiş rəhbəri Li Kuanı korrupsiya, mənimsəmə və 28 milyon dollar rüşvət almaqda təqsirli bilərək ölüm cəzasına məhkum edib.

presstvaz “Reuters” agentliyinə istinadən xəbər verir ki, məhkəmə həmçinin ölüm hökmünü iki il müddətinə təxirə salıb.

Xəbərdə bildirilir ki, maliyyə və sığorta sənayesində karyera quran Li Kuan 2024-cü ilin oktyabrında rüşvət almaqda şübhəli bilinərək həbs edilib.

O, 2019-cu ildə “New China Life Insurance” şirkətinin prezidenti, 2022-ci ildə isə direktorlar şurasının sədri təyin edilib.

İş adamı 2023-cü ilin avqustunda gözlənilmədən yaşını əsas gətirərək istefa verib. Həmin vaxt onun 60 yaşı tamam olub.

Tezliklə ona qarşı korrupsiya ittihamı irəli sürülüb. Müstəntiqlər müəyyən ediblər ki, Kuan “milli və dövlət maraqlarına əhəmiyyətli zərər vurmaqla dövlət əmlakını və vəsaitlərini mənimsəyib”. O, 2024-cü ilin oktyabrında Çin Kommunist Partiyasından xaric edilib və onun “qanunsuz əldə etdiyi vəsait” müsadirə edilib.

Son bir neçə il ərzində Çində həyata keçirilən antikorrupsiya kampaniyası çərçivəsində onlarla yüksək vəzifəli məmur və şirkət rəhbərlərinə ağır cəzalar verilib.