Donald Tramp: “Hazırda Ağ Ev Si Cinpini qəbul etmək üçün münasib deyil”

ABŞ Prezidenti Donald Trampın fikrincə, Ağ Ev binasının indiki durumu böyük dövlət tədbirlərinə, o cümlədən ÇXR Sədri Si Cinpini qəbul etməyə imkan vermir.

presstvaz xəbər verir ki, bu barədə “Fox News” telekanalı məlumat yayıb.

“İndi biz əgər Çin Sədri Si Cinpini qəbul etsək və ya hər hansı bir böyük dövlət tədbiri keçirsək, bunun üçün sadəcə yerimiz olmayacaq”, – deyə o, telekanala müsahibəsində bildirib.

ABŞ prezidenti oktyabrda Çin lideri ilə danışıqlarından sonra gələn ilin aprelində Pekinə səfər etmək niyyətində olduğunu bəyan edib. Bildirilir ki, Çin lideri Si Cinpin bundan sonra Florida ştatındakı Palm-Biç malikanəsinə və ya Vaşinqtona səfər edə bilər.

Bu ilin iyulunda Tramp Administrasiyası Ağ Evdə 200 milyon dollarlıq bal salonu inşa edilməsi barəsində qərar qəbul edib. Yeni məkan Ağ Evin 1902-ci ildə tikilmiş şərq qanadının yanında yerləşməlidir. Tədbirlər zamanı 650-yə qədər insan qəbul edə biləcək salonun sahəsi 8.4 min kvadratmetr olacaq. İnşasına oktyabrda start verilən məkan 2029-cu ilin yanvarında – Trampın ikinci prezidentlik müddətinin sonuna qədər hazır olmalıdır.