Londonda səhvən azadlığa buraxılmış məhbus polisə təslim oldu

Son günlərdə Uondsfort həbsxanasından səhvən azad edilən iki məhbusdan biri hakimiyyətə təslim olub.

presstvaz xəbər verir ki, bu barədə “Sky News” telekanalı məlumat yayıb.

Söhbət 35 yaşlı Uilyam Smitdən gedir. O, noyabrın 3-də məhkəmə tərəfindən dələduzluq ittihamı ilə üç il doqquz ay müddətinə azadlıqdan məhrum edilib. Elə həmin gün o, təsadüfən azadlığa buraxılıb. Qeyd olunub ki, Smit həbsxanada olduğu zaman video bağlantı vasitəsilə hökmü dinləyib. Məlumata görə, o, həbsxana əməkdaşlarının ona şərti cəza təyin edilməsi barədə səhv məlumat alması səbəbindən azadlığa buraxılıb.

Xatırladaq ki, oktyabrın 29-da Uondsfort həbsxanasından 24 yaşlı Əlcəzair vətəndaşı Braim Kaddur-Şərif səhvən azad edilib. O, soyğunçuluq məqsədilə başqasının ərazisini zəbt etməyə görə cəza çəkirdi və əvvəllər cinsi xarakterli cinayətlərə görə məhkum olunub. Qeyd olunur ki, Kaddur-Şərif 2019-cu ildə turist vizası ilə Böyük Britaniyaya daxil olub, lakin viza müddəti bitdikdən sonra immiqrasiya qanunlarını pozaraq ölkədə yaşamağa davam edib. Onun yaxın vaxtlarda vətəninə deportasiya ediləcəyi gözlənilirdi. Hazırda Britaniya polisi onun axtarışı ilə məşğuldur.