Uşaqlarınızda bu əlamətlər varsa, həkimə aparın – Yoxsa kar qala bilər

"Uşaq adını eşitmədikdə reaksiya vermirsə, televizoru daha uca səsə qoymağı xahiş edirsə və ya tez-tez qulaqlarına toxunursa, bu, eşitmə ilə bağlı problemin göstəricisi ola bilər".

presstvaz xəbər verir ki, bunu otorinolarinqoloq Lüdmila Caparidze deyib. O, uşaqlarda eşitmə problemlərinin bəzən valideynlər tərəfindən dərhal hiss edilmədiyini bildirib.

Həkimin sözlərinə görə bəzi ilkin əlamətlər diqqətdən qaça bilər. Məsələn, uşaq adını eşitmədikdə reaksiya vermirsə, televizoru daha uca səsə qoymağı xahiş edirsə və ya tez-tez qulaqlarına toxunursa, bu, eşitmə ilə bağlı problemin göstəricisi ola bilər.

Caparidze qeyd edib ki, uşaqlarda eşitmənin zəifləməsinin ən çox rast gəlinən səbəblərindən biri qulaqda yaranan kükürd tıxacıdır. O bildirib ki, quru və isti hava şəraitində kükürd bərkiyir və qulaq yolundan təbii şəkildə çıxmır, nəticədə eşitmə zəifləyə bilər.

Bəzən problem tıxacdan yox, eksudativ otit adlanan vəziyyətdən qaynaqlanır. Bu hal adətən virus infeksiyasından sonra və ya böyümüş adenoidlər zamanı yaranır. Qulaq pərdəsinin arxasında maye yığılır və səsin keçməsinə mane olur, sanki uşaq suyun içindən eşidirmiş kimi hiss olunur. Əgər bu maye uzun müddət qalarsa, eşitmə itkisi davamlı ola bilər.

Həkim valideynlərə uşaqların davranışına diqqət yetirməyi tövsiyə edib. Əgər uşaq tez-tez təkrar soruşursa, cizgi filmlərinin səsini artırırsa və ya yan tərəfdən gələn səslərə reaksiya vermirsə, onu LOR müayinəsinə aparmaq lazımdır. Cəmi bir neçə dəqiqəlik müayinə eşitmə pozğunluqlarını vaxtında aşkar etməyə kömək edir.

Caparidze əlavə edib ki, valideynlər problemi özbaşına həll etməyə çalışmamalıdır. Qulaqdakı kükürd tıxacını düzgün olmayan üsulla çıxarmaq qulaqda iltihaba və ya zədələnməyə səbəb ola bilər. Buna görə bu iş mütləq mütəxəssisə həvalə edilməlidir.