Bakıda Türkiyə Respublikasının 102-ci ildönümü münasibətilə rəsmi qəbul keçirilib

“Müasir Türkiyə Respublikasının Birinci Dünya müharibəsindən sonra Anadolunu işğal etmək istəyən imperialist güclərə qarşı, Qazi Mustafa Kamal Atatürkün rəhbərliyində Türk xalqının həyata keçirdiyi milli mübarizədən sonra, 1923-cü ildə qurulub. Bu gün Cümhuriyyətimizin 102-ci ildönümünü qeyd edirik. Bayramımız mübarək olsun”.

presstvaz xəbər verir ki, bunu Türkiyənin Azərbaycandakı səfiri Birol Akgün Türkiyə Respublikasının yaradılmasının 102-ci ildönümü münasibətilə Gülüstan sarayında keçirilən tədbirdə deyib.

O bildirib ki, Türkiyə ilə Azərbaycan arasında dünyada bənzəri olmayan, qəlblərdə dərin kök salmış müstəsna bir qardaşlığın şahidiyik:

“Tarixi Şuşa Bəyannaməsindən aldığımız ilham və cəsarətlə, “Bir millət – iki dövlət” anlayışı çərçivəsində Türkiyə, can Azərbaycanın beynəlxalq platformalarda ən güclü dəstəkçisi olmağa davam edəcək. Prezident İlham Əliyevin liderliyində, “bir yumruq, bir ürək” olaraq işğal altındakı Qarabağ azad edilib və Azərbaycan öz milli sərhədləri daxilində tam suverenliyini təmin edib.

Regionda davamlı sülhün bərqərar olması, inkişafın başlanması və əlaqələrin artması üçün tarixi bir fürsət yaranıb. Bu bölgədə sülh və sabitliyin təmin olunmasından yalnız region ölkələri deyil, bütün dünya fayda görəcək. Buna görə də qalıcı sülhün təmin olunması hamımızın ən böyük arzusu və diləyidir. Atatürkün ifadə etdiyi kimi: “Azərbaycanın sevinci bizim sevincimiz, kədəri bizim kədərimizdir”, – deyə səfir vurğulayıb.