İnsult riskinin gözlənilməz əlaməti açıqlandı – Elmi tədqiqat

Alimlər diş əti sağlamlığı ilə beyin vəziyyəti arasında birbaşa əlaqə aşkar ediblər.

presstvaz xəbər verir ki, ABŞ-nin Cənubi Karolina Universitetinin “Neurology Open Access” jurnalında dərc olunan araşdırmasına görə, diş əti iltihabı olan yetkinlərdə beyinin ağ maddəsinin zədələnməsinə əhəmiyyətli dərəcədə daha çox rast gəlinir.

Araşdırmada orta yaşı 77 olan 1 143 insan iştirak edib. Stomatoloji müayinədən sonra 800 iştirakçıda diş əti xəstəliyi diaqnozu qoyulub. MRT müayinəsi göstərib ki, diş ətində iltihab olan insanlarda ağ maddənin zədələnməsinin həcmi orta hesabla 2.83% təşkil edib, diş əti sağlam olanlarda isə bu göstərici 2.52% olub.

Risk faktorları nəzərə alındıqdan sonra məlum olub ki, diş əti xəstəlikləri olan insanlarda ciddi beyin zədələnməsi ehtimalı 56% daha yüksəkdir.

“Bizim məlumatlarımız təsdiq edir ki, ağız boşluğu sağlamlığı beyin sağlamlığı ilə sıx bağlı ola bilər”, – deyə tədqiqatın müəllifi professor Suvik Sen qeyd edib.