Beş əsrdən sonra ilk: Britaniya kralı Roma Papası ilə birlikdə dua etdi

Böyük Britaniya monarxı III Çarlz və Roma Papası XIV Leo Sikstin kapellasında xüsusi ibadət zamanı birgə dua ediblər.

presstvaz-ın kp.ru-ya istinadən verdiyi məlumata görə, bu hadisə tarixi əhəmiyyət daşıyır, çünki son 500 il ərzində ilk dəfə olaraq Britaniya kralı Roma Papası ilə birlikdə dua edib.

Dua 23 oktyabr tarixində kral cütlüyünün Vatikana rəsmi səfəri çərçivəsində baş tutub.

Bu əhəmiyyətli görüş Mikelancelonun unikal freskaları ilə tanınan əzəmətli Sikstin kapellasında baş tutub. Təntənəli libaslar geyinmiş kardinallar kapellada toplaşıb ibadətin başlamasını gözləyiblər. Bu məkan ənənəvi olaraq konklavların keçirilməsi üçün istifadə olunur ki, sonuncusu cari ilin mayında keçirilib və yeni Papa seçilib.

İbadətin musiqi müşayiəti XVI əsr ingilis bəstəkarı Tomas Tallisin əsərlərini əhatə edib ki, bu da katolik və anqlikan ənənələri arasındakı əlaqəni vurğulayıb. Tarixi IV əsrə gedib çıxan Sikstin kapellasının xoru ibadət zamanı xüsusi atmosfer yaradıb.