Rusiya XİN: “Kiyev Zaporojye AES üçün təhlükəsizlik zəmanəti verdi”

Gərgin müzakirələrdən sonra Zaporojye Atom Elektrik Stansiyasının normal xarici elektrik təchizatının bərpası üçün Kiyevdən təhlükəsizlik zəmanəti əldə etmək mümkün olub.

presstvaz xəbər verir ki, bu barədə məlumatı Rusiya XİN-ə istinadla “RİA Novosti” yayıb.

Nazirlikdən bildiriblər ki, müvafiq zəmanətlər olmadan elektrik xəttində bərpa işlərinin həyata keçirilməsi mümkün deyildi. Uzun və çətin məsləhətləşmələrdən sonra Ukrayna tərəfindən təhlükəsizlik zəmanətləri əldə etmək mümkün olub.

Zaporojye AES-in ehtiyacları üçün elektrik təchizatı ehtiyat generatorlar hesabına həyata keçirilib.

Rusiya tərəfi stansiyanın normal xarici elektrik təchizatını bərpa etmək üçün MAQATE-nin baş direktoru Rafael Qrossidən sükut rejiminin yaradılmasına yardım göstərməsini xahiş edib.

Zaporojye AES-in sonuncu xarici elektrik təchizatı xətti sentyabrın 23-də Ukrayna Silahlı Qüvvələrinin hücumu nəticəsində zədələnib. Rusiya xarici işlər nazirinin müavini Sergey Ryabkov bildirib ki, oktyabrın 18-dən Zaporojye AES ətrafında sükut rejimi yaradılıb.