Gələn il büdcənin 21 faizi müdafiə və milli təhlükəsizlik sahəsinə yönələcək

Maliyyə Nazirliyi 2026-cı il üzrə dövlət büdcəsində xərclərin funksional təsnifatını açıqlayıb.

presstvaz xəbər verir ki, gələn ilin büdcəsində ümumi dövlət xidmətlərinə 5 milyard 514.5 milyon manat vəsait ayrılması nəzərdə tutulur ki, bu da ümumi xərclərin 13.2%-ni təşkil edir.

Müdafiə və milli təhlükəsizlik sahəsinə yönəldiləcək vəsaitin həcmi 8 milyard 714.8 milyon manat səviyyəsində müəyyən edilib. Bu istiqamət üzrə xərclərin xüsusi çəkisi 20.9% olmaqla, büdcədə ən böyük paya malik istiqamətlərdən biridir.

Məhkəmə-hakimiyyət, hüquq-mühafizə və prokurorluq orqanlarının saxlanması üçün 3 milyard 343.6 milyon manat (8%), təhsil xərcləri üçün isə 5 milyard 15.9 milyon manat (12%) ayrılması planlaşdırılır.

Səhiyyə sahəsinə ayrılacaq vəsait 2 milyard 24.3 milyon manat (4.9%), sosial müdafiə və sosial təminat xərcləri isə 4 milyard 873 milyon manat (11.7%) olacaq.

Mədəniyyət, incəsənət, informasiya, gənclər və idman fəaliyyətləri üzrə xərclər 631.6 milyon manat (1.5%), mənzil-kommunal təsərrüfatına isə 334.5 milyon manat (0.8%) səviyyəsində müəyyən edilib.

Kənd təsərrüfatı sahəsinə ayrılacaq vəsait 1 milyard 222.1 milyon manat (2.9%), ətraf mühitin mühafizəsinə isə 420.2 milyon manat (1%) təşkil edir.

İqtisadi fəaliyyət sahəsinə 7 milyard 856.6 milyon manat (18.8%), əsas bölmələrə aid edilməyən xidmətlər üzrə isə 1 milyard 752.5 milyon manat (4.2%) xərclənməsi nəzərdə tutulub.