Rusiyada tanınmış sahibkarın arvadı küçədə bıçaqlandı

Rusiyanın Tatarıstan Respublikasının Kazan şəhərində elektrikli velosiped sürən stalker (çılğın adam anlamı – red.) tanınmış iş adamının arvadına bıçaqla hücum edib. Zərərçəkənin vəziyyəti ağırdır.

Bu barədə presstvaz “Baza” “Telegram” kanalına istinadən xəbər verir.

Məlumata görə, hadisə Vosstaniya küçəsində, 94 saylı gimnaziyanın yaxınlığında, qadın qızını məktəbə gətirdiyi zaman baş verib.

34 yaşlı İrina Şevıryova “BMW X6” markalı avtomobillə övladını məktəbə gətirib və uşağı yola saldıqdan sonra maşınına doğru addımlayıb. Bu ərəfədə əraziyə elektrikli velosipedlə naməlum şəxs yaxınlaşıb. O, velosipedi park edib, qadını pusquda gözləyib, ardınca hücum edərək, boynuna, sinəsinə zərbələr endirib.

Yoldan keçənlər qadına kömək ediblər, hazırda İrina Şevıryova reanimasiyadadır.

Polis hücum edən şəxsi axtarır.

“Baza”nın əldə etdiyi məlumata görə, zərərçəkən qadın inşaatçılar sülaləsindən olan sahibkar İvan Şevıryovun həyat yoldaşıdır. Respublikada nüfuzlu biznesmenin oğlu olan Şevıryov bir neçə şirkətə sahibdir, yol və avtomagistral tikintisi ilə məşğuldur.