Dünyada bir ilk: Artıq xroniki yorğunluğu asanlıqla müəyyən etmək olacaq

Britaniyalı alimlər dünyada ilk dəfə xroniki yorğunluq sindromunu (mialqik ensefalomielit) müəyyən etməyə imkan verən qan testi hazırlayıblar.

presstvaz xəbər verir ki, bu barədə “The Guardian” nəşri məlumat yayıb.

Qeyd olunur ki, indiyədək xəstəliyin diaqnostikası yalnız simptomlara əsaslanırdı. Bu isə diaqnozun qoyulmasında gecikmələrə və səhv qiymətləndirmələrə səbəb olurdu.

“Biz bilirik ki, bəzi xəstələr onlara diqqət yetirilmədiyindən şikayətlənirlər, hətta bəziləri onların xəstəliklərinin “yalnız zehni təsəvvür” olduğunu düşünürlər. Bizim kəşfimiz bu vəziyyəti dəyişəcək, artıq diaqnozu təsdiqləmək üçün sadə və dəqiq qan testi aparmaq mümkün olacaq”, – deyə Şərqi İngiltərə Universitetinin nümayəndəsi bildirib.

Qeyd edək ki, xroniki yorğunluq sindromu insanın ciddi xəstəliyi olmadan, altı aydan çox davam edən daimi yorğunluq hissi ilə xarakterizə olunur. Bu vəziyyətdə halsızlıq, əzələ ağrıları, yuxusuzluq və ya həddindən artıq yuxululuq, ayaqüstə tez yorulma kimi əlamətlər müşahidə edilir.

Belə halın yaranmasına bir çox amil səbəb ola bilər. Daimi yorğunluq bəzən qanazlığı, infeksiyalar, qaraciyər, ürək və böyrək çatışmazlıqları, vitamin və mineral çatışmazlığı, maddələr mübadiləsi pozğunluqları (hipoqlikemiya), hormonal problemlər (hipotireoz, böyrəküstü vəz çatışmazlığı) və hətta xərçəng kimi ciddi sağlamlıq problemlərinin ilkin siqnalı ola bilər.