Ahmad Kavesa Sengendo: “Halal anlayışı artıq yalnız dini məna daşımır”

“Qlobal halal sənaye hər il 10 faizdən çox artım tempi nümayiş etdirir”.

presstvaz xəbər verir ki, bunu İslam Əməkdaşlıq Təşkilatının (İƏT) baş katibinin iqtisadi məsələlər üzrə müşaviri Ahmad Kavesa Sengendo Bakıda keçirilən II Azərbaycan Halal Biznes (AZHAB) Forumunun açılış mərasimində çıxışı zamanı deyib.

O bildirib ki, bu gün dünyada iqtisadi, texnoloji və sosial dəyişikliklər çox sürətlə baş verir və bu şəraitdə halal sənayenin imkanlarını tam şəkildə dəyərləndirmək olduqca vacibdir:

“Halal anlayışı artıq yalnız dini məna daşımır, o, qlobal səviyyədə keyfiyyət və sağlamlığın simvoluna çevrilib. Statistik göstəricilərə əsasən, halal sənayesinin həcmi 2014-cü ildəki 3.2 trilyon ABŞ dollarından 2020-ci ildə 4.7 trilyon dollara yüksəlib”.

Ahmad Sengendo əlavə edib ki, halal iqtisadiyyatın inkişafı təkcə 1.9 milyarddan çox müsəlman üçün deyil, bütün dünya üçün yeni imkanlar yaradır.

Onun verdiyi məlumata görə, 2024-cü ildə halal məhsulların əsas ixracatçı ölkələri Braziliya, Hindistan, ABŞ, Rusiya, İndoneziya, Argentina, Türkiyə, Avstraliya, Çin və Malayziya olub.

Əsas idxalçı ölkələr isə İndoneziya, Malayziya, Türkiyə, Səudiyyə Ərəbistanı, Birləşmiş Ərəb Əmirlikləri, Misir, Banqladeş, Əlcəzair, İraq və Mərakeş olub.