Milyarder İbrahim Süleymanov iki ay müddətinə həbs edildi

Moskvanın Basman Rayon Məhkəməsi daha əvvəl qətl ittihamı üzrə saxlanılmış milyarder İbrahim Süleymanov barəsində həbs qətimkan tədbirini seçib.

presstvaz bu barədə TASS-a istinadən xəbər verir.

Məhkəmə onu dekabrın 2-dək istintaq təcridaxanasına göndərib.

İstintaq milyarderi iki qətlin fiqurantı, eləcə qətlə cəhdin təşkilatçısı hesab edir.

19:28

Rusiyada müstəntiqlər 2004-cü ildə törədilmiş qətlə dair cinayət işinin təhqiqatı çərçivəsində milyarder İbrahim Süleymanova qarşı ittiham irəli sürüblər.

presstvaz bu barədə TASS-a istinadən xəbər verir.

Məhkəmənin qərarı ilə qətimkan tədbiri qapalı rejimdə seçiləcək.

Daha əvvəl verilən məlumata görə, Moskva şəhərinin Basman Rayon Məhkəməsinə istintaq tərəfindən Süleymanovun həbsinə dair vəsatət daxil olub. Məhkəmə iclasının yaxın zamanda keçirilməsi planlaşdırılır.

13:48

Rusiyanın Maliyyə Bərpası və İflas Federal Xidmətinin (RMBİFX) keçmiş rəhbəri Georgi Talın qətli ilə bağlı aparılan istintaqda yeni detallar üzə çıxıb.

presstvaz “112” “Telegram” kanalına istinadla xəbər verir ki, milyarder İbrahim Süleymanovla yanaşı, əvvəllər mütəşəkkil cinayətkar qruplaşmanın lideri olmuş 55 yaşlı Abakar Darbişev də istintaq orqanları tərəfindən saxlanılıb.

Məlumata görə, o, oktyabrın 1-də Moskva vilayətinin Odintsovo şəhərində tutulub. Darbişevin evində aparılan axtarış zamanı şübhəli hüquq-mühafizə orqanlarına müqavimət göstərməyə çalışıb.

A.Darbişev ifadə vermək üçün polis bölməsinə aparılıb. Lakin ilkin məlumatlara əsasən, Darbişev ürək dayanması nəticəsində orada vəfat edib.

Qeyd edək ki, Abakar Darbişev vaxtilə Dağıstan mənşəli mütəşəkkil cinayətkar qruplaşmanın rəhbərlərindən biri olub. Məhz, o, milyarder İbrahim Süleymanova qarşı ifadə verən əsas şəxslərdən idi.

12:35

Rusiyanın paytaxtı Moskvada saxlanılan milyarder İbrahim Süleymanov 2004-cü ildə Rusiyanın Maliyyə Bərpası və İflas Federal Xidmətinin (RMBİFX) keçmiş rəhbəri Georgi Talın qətlində iştirakı ilə bağlı yoxlanılır.

presstvaz bu barədə “Baza” “Telegram” kanalına istinadla xəbər verir.

Söhbət Moskvanın iri biznes dairələrində tanınan Georgi Tala qarşı törədilən sui-qəsddən gedir. 2000-ci illərin əvvəllərində, o, paytaxt aeroportlarının müflisləşmə prosesləri ilə məşğul olur və tanınmış rusiyalı iş adamlarının maraqlarını müdafiə edirdi.

Fotoda RMBİFX-nin keçmiş rəhbəri Georgi Tal

Qeyd edək ki, hadisə Moskvanın mərkəzində baş verib. Qatil səhər saatlarında Basman küçəsindəki evindən çıxan G.Talı pusquya salıb. O, RMBİFX rəhbərinə dörd dəfə atəş açaraq hadisə yerindən qaçıb. Tal dərhal xəstəxanaya yerləşdirilsə də, həkimlər onun həyatını xilas edə bilməyiblər.

11:42

Milyarder və tanınmış iş adamı İbrahim Süleymanov Moskvada qətl ittihamı ilə saxlanılıb.

presstvaz xəbər verir ki, bu barədə məlumatı “Baza” “Telegram” kanalı yayıb.

Bildirilir ki, biznesmen bir neçə il əvvəl törədilmiş qətldə şübhəli bilinir.

“Yaxın saatlarda Süleymanov barəsində həbs-qətimkan tədbiri seçiləcək. İstintaq onun həbsdə saxlanılmasında israr edəcək”, – deyə mənbə bildirib.

Qeyd olunur ki, İbrahim Süleymanov müasir Rusiyanın ən nüfuzlu oliqarxlarından biri hesab edilir. O, əvvəllər dələduzluq və çirkli pulların yuyulması ittihamları ilə məhkum edilsə də, nüfuzunu və hakimiyyətini qorumağa nail olub. Onun “Sirena-Travel” SC aviabilet bronlaşdırma dövlət sistemi üzərində nəzarətə malik olduğu, həmçinin nəqliyyat, aviasiya və informasiya texnologiyaları kimi əsas sahələrdə ciddi təsir gücünə sahib olduğu bildirilir.