Milyonlarla manat dələduzluqda təqsirləndirilən Elariz Məmmədoğlunun kürəkəninə prokuror ağır cəza istədi

İnvestisiya fəaliyyəti ilə məşğul olan platformada valyuta alqı-satqısı həyata keçirməklə gəlir əldə etmək istəyən üç nəfərin külli miqdarda pulunu ələ keçirməkdə təqsirləndirilən Nizami Alışanov cinayət işi üzrə məhkəmə istintaqı yekunlaşıb.

presstvaz-ın məlumatına görə Bakı Ağır Cinayətlər Məhkəməsində hakim Aytən Əliyevanın sədrliyi ilə keçirilən prosesdə sənədlərin tədqiqi mərhələsinin yekunlaşması elan edildikdən sonra prokuror dövlət ittihamının müdafiə çıxışını edərək təqsirləndirilən Nizami Alışanovun 14 il azadlıqdan məhrum olunmasını məhkəməyə təklif edib.

Proses oktyabrın 13-də müdafiə tərəfinin çıxışı ilə işini davam etdirəcək.

Qeyd edək ki, ittihama görə, təqsirləndirilən Nizami Alışanov özünü səhm və valyuta alqı-satqısı ilə məşğul olan mütəxəssis kimi təqdim edib. O, Babək Məmmədzadənin 1 milyon 300 min, Zeynal Usubovun 945 min, Yadigar İsrafilovun isə 200 min dollar pulunu ələ keçirib.

Zərərçəkmişlərə dəyən ümumi ziyan 2 milyon 445 min dollar (4 milyon 156 min 500 manat) təşkil edib.

Ona Cinayət Məcəlləsinin 178.4-cü (dələduzluq – xüsusilə külli miqdarda ziyan vurmaqla törədildikdə) maddəsi ilə də ittiham irəli sürülüb.

İş üzrə zərərçəkən qismində 3 nəfər – Zeynal Mütəllim oğlu Usubov, Babək Məhəmməd oğlu Məmmədzadə və Yadigar Şibi oğlu İsrafilov tanınıb.

Əlavə edək ki, Nizami Alışanov AzTV-nin keçmiş sədri Arif Alışanovun qardaşı oğlu, hazırda Amerikada yaşayan müğənni Elariz Məmmədoğlunun kürəkənidir.