Cənubi Koreyada keçmiş birinci xanıma qarşı ittiham irəli sürdülər

Cənubi Koreyanın keçmiş birinci xanımı Kim Qon Hini korrupsiya, qiymətli kağızlarla fırıldaqçılıq və siyasi proseslərə müdaxilədə ittiham edilib.

presstvaz TASS-a istinadən xəbər verir ki, bu barədə ölkə prokurorluğunun nümayəndələri məlumat yayıb.

Kim Qon Hi avqustun 12-dən istintaq təcridxanasındadır və rəsmi ittiham irəli sürüldükdən sonra o, altı aya qədər həbsdə qala bilər. Onun əri, prezident vəzifəsində çalışmış Yun Sok Yol da qiyam təşkil etməkdə ittiham olunaraq həbs edilib. Başqa bir xüsusi prokuror da Cənubi Koreyanın keçmiş baş naziri Han Dok Suya qarşı rəsmi ittihamlar irəli sürüb.

Əvvəllər Koreya Respublikası liderlərinin həyat yoldaşları prokurorluq tərəfindən rəsmi ittihamlarla üzləşməyiblər və həbsdə olmayıblar. Kim Qon Hi beş dəfə dindirilməyə gedib, lakin Cənubi Koreya mediasının yazdığına görə, o, əsasən ifadə verməkdən imtina edib.

Xüsusi prokurorun komandası Kim Qon Hini 2009-2012-ci illər arasında avtomobil satıcısı “Deutsch Motors”da qiymətli kağızlarla fırıldaqçılıq, keşişlərdən bahalı hədiyyələr almaqda və deputatlığa namizədlərin seçiminə müdaxilə etməkdə ittiham edib.