Saakaşvilinin 2008-ci il seçkisindəki rəqibi vəfat edib

Gürcüstan parlamentinin beşinci və altıncı çağırış deputatı 61 yaşlı Levan Qaçeçiladze uzun sürən xəstəlikdən sonra vəfat edib.

presstvaz-ın xəbərinə görə, bu barədə Gürcüstan İctimai Yayımının Birinci Kanalı siyasətçinin qohumları və dostlarına istinadən məlumat yayıb.

Qaçeçiladze bu yaxınlarda xəstə idi. O, Türkiyədə müalicə alırdı, amma nəticəsi olmadı.

Qaçeçiladze siyasi karyerasına 1999-cu ildə beşinci çağırış Gürcüstan parlamentinin deputatı olmaqla başlayıb. O, keçmiş prezident Eduard Şevardnadzenin yaratdığı “Gürcüstan Vətəndaşları İttifaqı” hakim partiyasının partiya siyahısı ilə parlamentə daxil olub.

2004-cü ildə Qaçeçiladze yenidən parlamentə seçilib, lakin bu dəfə Tbilisinin Vake seçki dairəsindən majoritar deputat seçilib. O, Gürcüstanın keçmiş prezidenti Mixail Saakaşvili və onun hökumətinin qatı əleyhdarlarından biri olub. 2008-ci ildə Qaçeçiladze Gürcüstan prezidentliyinə namizəd və Saakaşvilinin əsas rəqibi olub. Prezident seçkisində o, 25.7% səs toplayıb və ikinci yeri tutub.