Şavkat Mirziyoyev: “Azərbaycan Mərkəzi Asiya və Avropanı birləşdirən strateji körpüdür”

“Azərbaycan Mərkəzi Asiya ilə Avropa arasında strateji körpü rolunu oynayır”.

presstvaz Özbəkistan prezidentinin saytına istinadən xəbər verir ki, bu sözləri “Özbəkistan, Azərbaycan və Avropa – ümumi inkişaf naminə əməkdaşlıq” yüksəksəviyyəli görüşün iştirakçılarına müraciətində Özbəkistan Prezidenti Şavkat Mirziyoyev deyib.

Onun sözlərinə görə, forum Mərkəzi Asiyanı dünyaya təqdim etmək, konsolidasiya və əməkdaşlıq proseslərini, eləcə də regionlararası əlaqələrin gücləndirilməsini müzakirə etmək üçün unikal imkan yaradır.

Prezident Ş.Mirziyoyev Azərbaycan-Özbəkistan münasibətlərinin qarşılıqlı etimad və dəstək ruhunda fəal inkişafını vurğulayıb.

“Xüsusilə qeyd etmək istəyirəm ki, Azərbaycan Mərkəzi Asiya və Avropanı birləşdirən strateji körpü rolunu oynayır. Biz Azərbaycan Prezidenti İlham Əliyevin yeni ümumi regional proseslərin inkişafında iştirak etmək istəyini və Cənubi Qafqaz və Mərkəzi Asiya arasında qarşılıqlı əlaqələrin gücləndirilməsi üçün göstərdiyi səyləri yüksək qiymətləndiririk. Fürsətdən istifadə edərək, dost Azərbaycan xalqını böyük tarixi nailiyyət – ABŞ-nin vasitəçiliyi ilə Vaşinqtonda Ermənistanla üçtərəfli Bəyannamənin imzalanması münasibətilə bir daha səmimi qəlbdən təbrik edirik”, – deyə o vurğulayıb.