Qazaxıstan ordusunda süni intellekt bölməsi yaradıldı

Qazaxıstan Müdafiə Nazirliyində süni intellekt texnologiyalarının tətbiqi və inkişafına cavabdeh olan ixtisaslaşdırılmış bölmə yaradılıb.

presstvaz-ın xəbərinə görə, bu barədə Müdafiə Nazirliyinin mətbuat xidməti məlumat yayıb.

Müdafiə Nazirliyindən bildirilib ki, yeni struktur Silahlı Qüvvələrin rəqəmsal transformasiyasının əsas elementi olacaq.

“Bölmənin əsas vəzifələri böyük həcmdə məlumatların təhlili, idarəetmənin avtomatlaşdırılması, əməliyyat ssenarilərinin modelləşdirilməsi və müasir hərbi şəraitdə idarəetmə qərarlarının qəbulu sürətinin artırılması üçün süni intellekt həllərinin işlənib hazırlanması və həyata keçirilməsidir”, – deyə məlumatda qeyd olunub.

Bölmə yerli və beynəlxalq elmi-tədqiqat mərkəzləri, aparıcı universitetlər və ixtisaslaşmış İT şirkətləri ilə qarşılıqlı əlaqədə olacaq ki, bu da təkcə müdafiə sahəsində qabaqcıl inkişafları həyata keçirməyə deyil, həm də süni intellektin hərbi tətbiqi üzrə milli məktəb formalaşdırmağa imkan verəcək.

“Süni intellektin tətbiqi üzrə bölmənin yaradılması həm də insan resurslarının inkişafına yönəlib: müasir alqoritmlər və sistemlərlə işləmək bacarığına malik olan zabit-analitiklər və rəqəmsal texnologiyalar sahəsində mütəxəssislərin hazırlanması planlaşdırılır”, – deyə müdafiə idarəsi əlavə edib.