ABŞ-də 67 nəfərin ölümünə səbəb olan təyyarə qəzasının təqsirkarı açıqlandı

ABŞ-nin Federal Mülki Aviasiya İdarəsi (FAA) bu il yanvarın 29-da Vaşinqtonda baş verən və 67 nəfərin həyatına son qoyan dəhşətli aviaqəzanın təfərrüatını açıqlayıb. Məlum olub ki, faciəyə hava hərəkətini idarə edən dispetçerin ciddi səhlənkarlığı səbəb olub. O, “American Airlines” şirkətinə məxsus sərnişin təyyarəsinin heyətini ABŞ Quru Qoşunlarının “Black Hawk” helikopterinin təhlükəli dərəcədə yaxınlaşması barədə vaxtında xəbərdar etməyib.

Oxu.Az-ın verdiyi məlumata görə, bu barədə Milli Nəqliyyat Təhlükəsizliyi Şurasında (NTSB) keçirilən dinləmələrdə bəyan edilib.

FAA nümayəndəsi Nik Fullerin sözlərinə görə, qəzadan əvvəl dispetçer təyyarəni “Black Hawk” helikopterinin trayektoriyası haqqında məlumatlandırmalı və vizual eşelonlaşdırma (yəni vizual məsafə saxlama) sistemindən istifadə olunduğunu bildirməli idi.

NTSB-nin sədri Cennifer Homendi isə bildirib ki, hadisədən 10 dəqiqə əvvəl dispetçer eyni anda 21 hava gəmisi ilə əlaqə saxlayıb. O, araşdırma zamanı müstəntiqlərə bildirib ki, qəzadan təxminən 15 dəqiqə əvvəl özünü “həddən artıq yüklənmiş” hiss edib.

FAA qeyd edir ki, hadisənin baş verdiyi anlarda Vaşinqtonun hava limanında hər saatda orta hesabla 79 təyyarə eniş və uçuş həyata keçirib.

Xatırladaq ki, yanvarın 29-da “PSA Airlines” aviaşirkətinə məxsus “Bombardier CRJ700” sərnişin təyyarəsi Vaşinqton hava limanına eniş edərkən təlim uçuşu həyata keçirən “Sikorsky UH-60” (“Black Hawk”) hərbi helikopteri ilə toqquşub. Hər iki hava gəmisi çaya düşüb. Təyyarədə 64 nəfər, helikopterdə isə 3 nəfər olub. Onların hamısı həlak olub.