Kobi Brayantın ayaqqabısı 240 min dollara satıldı

Milli Basketbol Assosiasiyasının (NBA) beşqat çempionu mərhum Kobi Brayantın “Los-Anceles Leykers”in start heyətində debüt oyununda geyindiyi idman ayaqqabısı hərracda 240 min dollara satılıb.

presstvaz-ın xəbərinə görə, bu barədə “SCP Auctions” hərrac evinin Mətbuat Xidməti məlumat yayıb.

Brayant 1997-ci il yanvarın 28-də “Dallas”la matçda “Leykers”in start heyətində debüt edib. Oyun 102:83 hesabı ilə “Leykers”in xeyrinə başa çatıb, Brayant 12 xal, 3 ribaund və 2 məhsuldar ötürmə edib.

Brayant 1996-cı il NBA draftının ilk turunda “Şarlott” klubu tərəfindən 13 nömrəsi ilə seçilib və elə həmin il bütün karyerasını keçirdiyi “Leykers”ə dəyişdirilib. Komanda ilə birlikdə o, beş dəfə (2000, 2001, 2002, 2009, 2010) NBA çempionu olub. 2009 və 2010-cu illərdə Kobi Brayant NBA finallarının ən dəyərli oyunçusu, 2008-ci ildə isə müntəzəm mövsümün sonunda ən dəyərli oyunçu kimi tanınıb. ABŞ milli komandasının tərkibində Kobi Brayant iki dəfə (2008, 2012) Olimpiya Oyunlarının qalibi olub, 18 dəfə NBA “All-Star” Oyunlarında iştirak edib.

Xatırladaq ki, 26 yanvar 2020-ci ildə göyərtəsində 41 yaşlı Brayantın olduğu şəxsi helikopter Los-Anceles yaxınlığında qəzaya uğrayıb. Pilot və bütün səkkiz sərnişin, o cümlədən Brayant və onun 13 yaşlı qızı Cianna həlak olublar.