AP deputatı: “Ermənistanın Aİ-yə daxil olması hazırda qeyri-mümkündür”

Ermənistanın Avropa İttifaqına (Aİ) daxil olması hazırda tamamilə qeyri-realdır.

presstvaz-ın Avstriyanın “Auf1” portalına istinadən verdiyi xəbərə görə, bu barədə Almaniya üçün Alternativ Partiyası (AfD) Avropa Parlamentindəki nümayəndə heyətinin rəhbərinin müavini, İnsan Hüquqları Komitəsinin koordinatoru Tomaş Frölix bildirib.

“Hesab edirəm ki, bu, indiki mərhələdə tamamilə qeyri-realdır”, – deyə o vurğulayıb.

Frölix Ermənistanın üzvlüyünün Aİ-nin strateji maraqlarına zidd olduğunu izah edib.

“Bu, digər məsələlərlə yanaşı, Azərbaycanın Aİ üçün mühüm rol oynaması ilə bağlıdır. Aİ-nin Azərbaycanla ortaq maraqları var, xüsusən də Rusiya faktiki olaraq enerji resurslarının tədarükçüsü olmaqdan çıxdıqdan sonra. Bu kontekstdə Azərbaycan öz yerini qismən tutub və onun Brüssel üçün əhəmiyyəti artıb”.

AfD nümayəndəsi vurğulayıb ki, Aİ-nin Ermənistanla Azərbaycanın zərərinə yaxınlaşmasına son dərəcə az ehtimal var və bu qeyri-realdır. Bu kontekstdə siyasətçi Brüsselin ikili standartlarına diqqət çəkib:

“Aİ Ermənistana həqiqətən lazım olan yerdə dəstək vermir və eyni zamanda Azərbaycanla fəal əməkdaşlıq edir. Bu, özlüyündə heç də pis deyil, lakin Brüsselin adətən istifadə etdiyi ritorika ilə açıq şəkildə ziddiyyət təşkil edir”.

Paşinyanın tənqidi

Frölix hesab edir ki, Ermənistanın baş naziri öz resurslarına görə hələ də Azərbaycana daha çox meyilli olan Qərbə mərc qoyduğu üçün səhvə yol verib.

“Onlar (Ermənistan hakimiyyəti) daha çox qərbyönlü kurs seçdilər, Avropadan dəstək ümid edərək Kremllə əlaqələri zəiflətdilər. Amma Qərbin maraqları yenə də, Azərbaycana daha yaxındır… Kritik məqamlarda Aİ Ermənistanla deyil, Azərbaycanla birgə hərəkət etməyə meyllidir”, – deyə AfD nümayəndəsi vurğulayıb.