Atalıq etikası: Piter Façinelli kinodakı “oğlunun” fikirlərini oxumaqdan imtina etdi

Məşhur “Twilight” saqasında vampir klanının başçısı Karlayl Kallen rolunun ifaçısı Piter Façinelli “Denver Fan Expo” festivalında gözlənilməz etirafı ilə gündəm olub. 51 yaşlı aktyor Stefani Mayerin “Midnight Sun” kitabını prinsipial olaraq oxumadığını və oxumaq niyyətində olmadığını bildirib. Kitabdakı hekayə onun kinematoqrafik “oğlu” Edvardın dilindən nəql edilir.

presstvaz bu barədə “Screenrant”a istinadən xəbər verir.

Bildirilir ki, qərarın səbəbi aktyorun öz personajına dərin bağlılığı və xüsusi aktyorluq etikası ilə əlaqəlidir.

“Mən onu oxuya bilmərəm. Bu, Edvardın fikirləridir! Mənə elə gəlir ki, bu, Karlayl onun gündəliyini oxuyurmuş kimi görünəcək. Bu qeyri-təbiidir. Bir ata olaraq, onun mənim haqqımda nə düşündüyünü bilmək istəmirəm”, – deyə Façinelli öz mövqeyini izah edib.

Pərəstişkarların uzun illər gözləməsindən sonra 2020-ci ildə çıxan “Midnight Sun” romanı, ilk “Twilight” kitabındakı hadisələrə artıq Edvard Kallenin nöqteyi-nəzərindən alternativ baxış təqdim edir. Kitab təkcə onun Bellaya olan hisslərini deyil, həm də Kallenlərin ailəsindəki mürəkkəb münasibətləri, o cümlədən öz yaradıcısı və qəyyum atası Karlayla münasibətini açıqlayır.

Maraqlıdır ki, 300 yaşlı vampir-həkim rolunu oynayan Façinelli öz personajı ilə o qədər doğmalaşıb ki, çəkilişlərin başa çatmasından 10 ildən çox vaxt keçməsinə baxmayaraq, ekrandakı oğluna münasibətdə müəyyən sərhədləri qoruyub saxlayır.

Qeyd edək ki, 2008-2012-ci illər arasında çıxan beş filmdən ibarət “Twilight” kino franşizası, dünya üzrə 3 milyard dollardan çox gəlir əldə edərək öz dövrünün ən uğurlu layihələrindən birinə çevrilib. Tənqidçilərin birmənalı olmayan rəylərinə baxmayaraq, saqa bütün dünyada böyük pərəstişkar ordusu qazanıb və baş rolların ifaçıları olan Kristen Styuart, Robert Pattinson və Teylor Lotneri ulduz statusuna yüksəldib.