Dördüncü ixtisar dalğası: “Microsoft”un oyun bölməsində nə baş verir?

“Microsoft” “Xbox” bölməsində növbəti ixtisar dalğasına hazırlaşır.

presstvaz xəbər verir ki, bu barədə “Bloomberg” mənbələrə istinadla məlumat yayıb.

Bildirildiyinə görə, yenidənqurma planı “Xbox” oyun bölməsində əhəmiyyətli sayda əməkdaşa təsir edəcək.

Prosesin 30 iyun-6 iyul tarixləri arasında başlanacağı gözlənilir.

“Microsoft” bu xəbərlə bağlı hələlik rəsmi açıqlama verməyib.

Qeyd edək ki, bu, son 18 ay ərzində “Microsoft”un oyun sahəsində həyata keçirdiyi dördüncü böyük ixtisar dalğası olacaq. Şirkət bundan əvvəl üç dəfə ixtisar həyata keçirib və bu çərçivədə “Arkane Austin”, “Tango Gameworks” kimi daxili studiyalar bağlanıb.

Bütün bunlar 69 milyard dollar dəyərində “Activision Blizzard”ın alınmasının tamamlanmasından sonra “Microsoft” rəhbərliyinin oyun bölməsində səmərəlilik və rentabellik tələblərini artırması ilə əlaqələndirilir.

Mənbələr bildirirlər ki, yeni ixtisarlar çərçivəsində daha bir neçə daxili oyun studiyasının bağlanması ehtimalı da var, lakin bu barədə hələlik yekun qərar verilməyib.