İspaniya NATO-nun ideyasını rədd etdi

İspaniya hökuməti NATO-nun baş katibi Mark Rüttenin qarşıdan gələn alyans sammitində müdafiə xərclərini ÜDM-in (Ümumdaxili Məhsul) 5%-nə qədər artırmaq tələbini rədd edib.

presstvaz bildirir ki, bu barədə “RTVE” teleradio şirkəti məlumat verib.

Nəşrin versiyasına görə, Krallığın baş naziri Pedro Sançes bununla bağlı məktubla məlumat verib. Nazirlər Kabinetinin rəhbəri hesab edir ki, belə bir öhdəlik əsassız olmaqla yanaşı, həm də əks nəticə verə bilər. Siyasətçi həmçinin fikrini belə ifadə edib ki, hər bir NATO üzvü bu cür xərclərə hazır olub-olmadığına müstəqil şəkildə qərar verə bilər.

“Suveren müttəfiq olaraq biz bunu etməməyi seçirik”, – deyə Sançesin mesajında bildirilib. Bununla əlaqədar, o, NATO-nun qarşıdan gələn sammitinin bəyannaməsinə “daha ​​çevik formulun” daxil edilməsini, 5%-lik göstəricinin opsional edilməsini və ya İspaniyanın bu öhdəlikdən kənarlaşdırılmasını təklif edib.

Eyni zamanda, baş nazir İspaniyanın NATO-ya tam sadiqliyini vurğulayıb və əmin edib ki, o, gələcək illərdə də üzərinə düşən vəzifəni yerinə yetirməyə davam edəcək, Avropa təhlükəsizlik arxitekturasına fəal töhfəsini verəcək.

“Buna baxmayaraq, Madrid bu sammitdə ÜDM baxımından konkret məqsədli xərclər göstəricisi üzrə öhdəliyi üzərinə götürə bilməyəcək”, – deyə Sançes əlavə edib.