“Kəpəz”in yeni baş məşqçisi: “Yer axtarışındayıq”

“Kəpəz”in Azər Bağırovla yola davam edəcəyini düşünürdüm”.

Bunu presstvaz-a açıqlamasında “Kəpəz” klubunun yeni baş məşqçisi Adil Şükürov deyib.

“Kəpəz” klubunun təklifi mənim üçün sürpriz oldu. Rəhbərliklə danışdıq, gələcəyə dair düşüncələrimiz üst-üstə düşdüyü üçün müqavilə bağladıq. Azər Bağırovla yaxından ünsiyyətim olduğu üçün onun nəyə görə klubdan ayrıldığını soruşdum, mənə dedilər ki, rəhbərliklə keçmiş baş məşqçinin fikirləri uyğunlaşmayıb, bu səbəbdən də yolları ayırıblar. Daha sonra isə təklifi qəbul etdim”, – A.Şükürov deyib.

O, komandanın yeni mövsümdəki hədəflərindən də danışıb:

“Yeni mövsümdə ideal və daha güclü komanda yaratmaq istəyirik. Budəfəki hədəfimiz Azərbaycan Premyer Liqasında güclü “Kəpəz”in olmasıdır. Yeni futbolçu transferi üçün işlərə yaxın günlərdə başlayacağıq”.

Klubun yeni baş məşqçisi stadion problemini də dilə gətirib.

“Hazırda “Kəpəz” klubunun çıxış etdiyi Gəncə şəhər stadionu təmirdə olduğundan oynamaq üçün yer axtarışındayıq. Tovuz şəhər stadionu da təmirə bağlanacağı üçün orada görüşlər keçirə bilməyəcəyik. Rəhbərliklə müzakirə etdik, ən qısa zamanda bu problemi də aradan qaldıracağıq”, – deyə A.Şükürov bildirib.

Anar Həsənov