Kolumbiya prezidenti qızına və nazirlərin övladlarına qarşı təhdidlərdən danışdı

Kolumbiya Prezidenti Qustavo Petro kiçik qızının ünvanına təhdid mesajlarının gəlməyə başladığını bildirib. Oxşar mesajları onun hökumətinin bütün üzvlərinin övladları da alır.

presstvaz-ın xəbərinə görə, bu barədə o, “X” sosial şəbəkəsindəki hesabında yazıb.

Kolumbiya liderinin fikrincə, bu, senatora və prezidentliyə mümkün namizəd Migel Uribeyə qarşı sui-qəsd cəhdi ilə bağlıdır.

Petronun sözlərinə görə, təhdid dolu mesajlar botlardan istifadə etməklə, sosial şəbəkələr vasitəsilə göndərilib.

Ölkənin hüquq-mühafizə orqanları artıq təhqiqata və təhdidlərin göndərilməsinə görə məsuliyyət daşıyanların axtarışına başlayıb. Araşdırmalarda polis kibermərkəzindən əlavə, Baş Prokurorluq və kəşfiyyat orqanları da iştirak edirlər.

Qeyd edək ki, mayın 9-da Kolumbiyanın keçmiş prezidenti Alvaro Uribe də xarici kəşfiyyatdan ona qarşı növbəti sui-qəsd cəhdinin hazırlandığı barədə məlumat aldığını bildirib.

Xatırladaq ki, ötən şənbə günü – iyunun 7-də Boqotada mitinq zamanı 15 yaşlı yeniyetmə Kolumbiya prezidentliyinə ehtimal olunan namizəd, 39 yaşlı senator Migel Uribeyə bir neçə dəfə atəş açıb və güllə onun başına dəyib. Sabiq dövlət başçısının səhhətinin vəziyyəti ağır olaraq qalır.

Böyük rezonansa səbəb olan bu hadisə xüsusi nəzarətə götürülüb. Polisə artıq məlumdur ki, cinayətkarın atəş açdığı “Qlyuk” tapançası 2020-ci ildə ABŞ-nin Arizona ştatındakı mağazalardan birindən alınıb.