Pekin Vaşinqtonu razılaşmanı pozmaqda ittiham etdi

Çin Xalq Respublikasının hakimiyyət orqanları ABŞ-nin addımlarının, o cümlədən çiplərin ixracına nəzarət üzrə yeni qaydalar və tələbə vizalarının ləğvi ilə bağlı hədələrin Vaşinqton və Pekin arasında əldə olunmuş razılaşmaları pozduğu və Çinin maraqlarına xələl gətirdiyi qənaətindədir.

presstvaz-ın “Associated Press” agentliyinə istinadən xəbərinə görə, bu barədə Çin Ticarət Nazirliyinin bəyanatında bildirilib.

“ABŞ birtərəfli qaydada yeni iqtisadi və ticarət mübahisələrinə səbəb olub və bununla da ikitərəfli iqtisadi və ticarət əlaqələrinin qeyri-müəyyənliyini və qeyri-sabitliyini dərinləşdirib”, – deyə nazirlikdən qeyd edilib.

“Bu hərəkətlər keçən ay Cenevrədə keçirilən görüşdə əldə olunmuş konsensusa ciddi şəkildə ziddir”, – deyə sənəddə bildirilib.

Ticarət Nazirliyi bəyan edib ki, Çin müqavilənin üzərinə düşən hissəsini yerinə yetirib, ABŞ isə müqavilələri pozub. Bəyanatda vurğulanır ki, öhdəliklərin yerinə yetirilməməsi halında Çin hakimiyyəti “qətiyyətli tədbirlər” görə bilər.

Xatırladaq ki, mayın 12-də Cenevrədə Pekin və Vaşinqton nümayəndə heyətləri arasında iqtisadi və ticarət danışıqları keçirilib. Nəticələr həm Çin Dövlət Şurası, həm də Ağ Ev tərəfindən yüksək qiymətləndirilib.

“Associated Press”in məlumatına görə, görüşdən sonra ABŞ Donald Trampın may ayında tətbiq etdiyi 145%-lik rüsumları 30%-ə endirməyə razılaşıb. Buna cavab olaraq Çin tərəfi ABŞ mallarına tətbiq edilən rüsumları 125%-dən 10%-ə endirəcəyini vəd edib.