Aİ Məhkəməsi fon der Lyayeni COVID peyvəndi müqavilələrini gizlətməkdə məsul hesab etdi

Avropa İttifaqı Məhkəməsi Avropa Komissiyasının Prezidenti Ursula fon der Lyayeni 2021-2023-cü illərdə COVID-19 peyvəndlərinin alınması ilə bağlı müqavilələrə dair məlumatların gizlədilməsində iştirakını təsdiqləyib.

presstvaz bu barədə TASS-a istinadən xəbər verib.

“Məhkəmə iddiaçının dəlillərini əsaslı hesab etdi”, – deyə məhkəmə qərarında bildirilib.

İşin baxılmasına səbəb COVID-19 peyvəndlərinin alınması ilə bağlı danışıqlarda şəffaflığın yetərsiz olması ilə bağlı irəli sürülən ittihamlar olub. Mətbuatın məlumatına görə, pandemiyanın qızğın dövründə Ursula fon der Lyayen “Pfizer” şirkətinin rəhbəri Albert Burla ilə şəxsi yazışmalar apararaq milyardlarla avroluq peyvənd müqaviləsini müzakirə edib.

Avropa Komissiyası həmin dövrdə sözügedən müqavilənin SMS vasitəsilə müzakirə edildiyini təsdiqləsə də, mesajların dərcindən imtina edib. Səbəb kimi həmin yazışmaların guya təsadüfən silindiyi bildirilib.

Bu məlumatlar fonunda Avropa Prokurorluğu müqavilələrin şərtləri ilə maraqlanmağa başlayıb. Xüsusilə mesajların məzmununun ictimaiyyətə açıqlanmaması narahatlıq doğurub.

Ekspertlərin fikrincə, məhkəmə qərarı Ursula fon der Lyayenin siyasi karyerasına ciddi təsir göstərə bilər. Onun yeni vəzifə müddəti rəsmi olaraq keçən il dekabrın 1-də başlayıb.