“Sevilya” azarkeşləri klubun bazasına hücum ediblər

İspaniya La Liqasının 35-ci turunda”Sevilya” komandasının səfərdə “Selta”ya məğlub olması klub azarkeşlərinin səbir kasasını daşırıb.

presstvaz Sports.ru-ya istinadla xəbər verir ki, azarkeşlər komandanın göstərdiyi nəticələdən narazılıqlarını oyunçulara və rəhbərliyə birbaşa deməkdən ötrü “San-Pablo” aeroportunda klub üzvlərini qarşılayıblar.

Komanda fanatlarla görüşməyərək hava limanını tərk etdikdən sonra yüzlərlə azarkeş “Sevilya”nın bazasının qarşısında toplaşıb. Komanda avtobusu bazaya polisin və mülki qvardiyanın gücləndirilmiş mühafizəsi altında gəlib.

Futbolçuları təhqir edən və avtobusa yumurtalar atan kütlənin qarşısını almaq üçün polis havaya rezin güllələr atmaq məcburiyyətində qalıb.

Bir qrup azarkeş hasarı sındıraraq, içəri keçməyə cəhd göstərib. Klub rəhbərliyi təhlükəsizlik baxımından komandanı gecə idman bazasının ərazisində saxlamaq qərarına gəlib.

Qeyd edək ki, “Sevilya” La Liqada 38 xalla 16-cı yerdə qərarlaşıb. Komanda səkkiz oyundur qələbə üzünə həsrət qalıb.