Hindistanda dəhşətli hadisə: Bəbir anaya hücum edib, qucağından körpəni dartıb alıb və gözdən itib

Hindistanın Uttarakhand ştatında dəhşətli hadisə baş verib.

presstvaz xəbər verir ki, bu barədə “The Times of India” nəşri məlumat yayıb.

Məlumata görə, Mana Kabhra kəndində açıq havada tualetə gedən qadına və onun uşağına bəbir hücum edib. Yırtıcı oğlan uşağını anasının qucağından dartıb almağa müvəffəq olub və dərədə gözdən itib.

Uşaq sonradan boynunda dərin yaralarla aşkarlansa da, onun həyatını xilas etmək mümkün olmayıb.

Hindistan Meşə Təsərrüfatı İdarəsi hadisəyə dərhal reaksiya verib. Ölən uşağın ailəsinə təzminat ödənilməsi üçün prosedurlara başlanılıb. Bundan əlavə, səlahiyyətlilər bəbir hücumunun baş verdiyi ərazidə patrul xidmətlərinin gücləndirildiyini açıqlayıblar. Məmurlar təhlükəli yırtıcının tutulması üçün artıq ərazidə üç tələ qurulduğunu bildiriblər.

Qeyd edək ki, statistika həyəcanverici tendensiyanı göstərir: Hindistanda vəhşi heyvanların insanlara hücumlarının sayı son iki onillikdə əhəmiyyətli dərəcədə artıb. Əgər 20 il əvvəl ildə 55-60 belə hadisə qeydə alınırdısa, hazırda bu rəqəm 250-300-ə çatır.