Alimlər yırtıcıların ölümcül virusları yarasalardan insanlara necə ötürdüyünü aşkar etdi

Uqandanın Kraliça Elizabet milli parkında yerləşən bir mağarada, alimlər uzun müddət ərzində Misir meyvəyarasalarının koloniyasını müşahidə ediblər. Onlar müəyyən ediblər ki, müxtəlif yırtıcı heyvan növləri bu mağarada birbaşa yarasalara hücum edərək onları ovlayır. Bu isə o deməkdir ki, yarasaların daşıdığı viruslar əvvəlcə bu yırtıcılara, daha sonra isə insanlara keçə bilər. 

presstvaz xəbər verir ki, Uqandadakı bu müşahidələr barədə geniş məqalə "The New York Times" nəşrində dərc olunub.

Məqalədə qeyd olunur ki, zooloqların çəkdiyi videolarda müxtəlif məməli və quş növlərinin yarasalarla birbaşa təmasda olduqları aydın görünür. Bu da virusların yeni canlı növlərinə keçməsi üçün saysız-hesabsız imkanlar yaratdığını sübut edir.

Uqandalı bioloq Bosko Atukvatse tərəfindən lentə alınan videolarda yarasaları ovlayan 13 fərqli yırtıcı növü əks olunub. Onların arasında iri ləkəli genetlər, afrika sivetləri, afrika qartal-balıqçılar, afrika qayalı pitonları, L'Hoes meymunları və babuinlər yer alıb.

"Atukvatse" qeyd edir: "Bu mağaraya yarasa yeməyə nə qədər müxtəlif heyvanın gəldiyi heyrətamizdir. Sanki bu yer ətrafdakı bütün heyvanlar üçün pulsuz yemək mənbəyidir".

Misir meyvəyarasaları bir çox virusun, o cümlədən insanlar üçün ölümcül olan Marburq virusunun daşıyıcısıdır. Bu virus birbaşa yarasadan insana keçə bildiyi kimi, digər viruslar yalnız başqa bir orqanizmdə mutasiyaya uğradıqdan sonra insan üçün təhlükəli hala gəlirlər. Məhz yarasalarla qidalanan yırtıcı heyvanlar belə ara canlılar kimi çıxış edə bilərlər.

Hazırda alimlər bu potensial virusların yırtıcılara necə təsir etdiyini araşdırmağa hazırlaşırlar. Xüsusilə babuinlər üzərində müşahidələr aparılması planlaşdırılır, çünki bu növ viruslara qarşı daha həssasdır. İstisna edilmir ki, bəzi babuin populyasiyaları Marburq virusuna yoluxa və nəticədə məhv ola bilər./hit.az